1. Нүүр хуудас
2. Мэдээ, мэдээлэл
3. Та энд байна

Зам, тээврийн хөгжлийн яамны харьяа Монгол Улсын Далайн захиргаанаас Далайд гарцгүй хөгжиж байгаа орнуудын олон улсын судалгааны төв, “Монголын тээвэр зуучлагчдын нэгдсэн холбоо” ТББ-тай хамтран “Монгол Улсын тээвэр логистикийн салбар ба Хуурай боомт” сэдвийн хүрээнд хамтарсан хэлэлцүүлгийг НҮБ-ын Суурин төлөөлөгчийн газрын хурлын танхимд өнөөдөр /2023 оны 10-р сарын 13-ны өдөр/ зохион байгууллаа.

Энэ удаагийн хэлэлцүүлгийн хүрээнд Монгол Улсад байгуулахаар төлөвлөж буй “Хуурай боомт”-ын талаар төрөөс баримталж буй бодлого, хэрэгжүүлж буй арга хэмжээ, цаашдын зорилтын талаар хувийн хэвшлийн аж ахуйн нэгж, байгууллагуудад танилцуулахаас гадна Монгол Улсын тээвэр зуучлалын үйл ажиллагааг явуулж буй байгууллагуудад тулгардаг нийтлэг хүндрэл, бэрхшээлийн талаар сонсож, даван туулахад чиглэгдсэн арга замын талаар зөвшилцлөө.

Далайн захиргаа нь Монгол Улсын нийслэл Улаанбаатарт төв байр нь ажилладаг анхны олон улсын байгууллага болох Далайд гарцгүй хөгжиж байгаа орнуудын олон улсын судалгааны төвтэй 2014 онд хамтран ажиллах тухай Санамж бичиг байгуулсан бол “Монголын тээвэр зуучлагчдын нэгдсэн холбоо” ТББ-тай 2018 онд Санамж бичиг байгуулан жил бүр салбарт зайлшгүй шаардлагатай үйл ажиллагааг төлөвлөх замаар хамтран ажиллаж байна.

​Эдгээр Санамж бичгийн гол агуулга нь төр, хувийн хэвшлийн хамтын ажиллагааг хангах, мэдээ мэдээллийг харилцан солилцох индэртэй болох, улмаар далайд гарцгүй Монгол Улсын импортын бараа бүтээгдэхүүнийг гуравдагч орноос далайгаар болон хөрш орнуудын нутаг дэвсгэрээр дамжуулан тээвэрлэх үйл ажиллагаанд тулгарах аливаа асуудлыг Монгол Улсын нэгдэж орсон олон талт гэрээ, хэлэлцээрийн хүрээнд шийдвэрлэх арга замыг эрэлхийлэх, конвенцоор олгогдсон эрх, боломжийг бодитоор хэрэгжүүлэх замаар тээвэр, логистикийн зардлыг бууруулах гол зорилготой юм.

Хамтарсан хэлэлцүүлгээс гарсан дүгнэлт, санал, цаашид авч хэрэгжүүлэх арга хэмжээний зөвлөмжийг боловсруулан Зам, тээврийн хөгжлийн яаманд хүргүүлэх ба Далайн захиргааны 2024 оны үйл ажиллагааны төлөвлөгөөнд тусгуулж ажиллана.