1. Нүүр хуудас
2. Мэдээ, мэдээлэл
3. Та энд байна

     ОХУ-ын Ерөнхийлөгч В.В.Путины санаачилгаар дөрөв дэх жилдээ зохион байгуулагдсан Дорнын эдийн засгийн форумын үеэр буюу 2018 оны 09 дүгээр сарын 12-ны өдөр Монгол Улсын Далайн захиргаа болон ОХУ-ын Адмирал Г.И.Невельскойн нэрэмжит Тэнгисийн их сургууль хооронд байгуулах хамтран ажиллах тухай харилцан ойлголцлын Санамж бичигт гарын үсэг зурлаа.

Энэхүү гарын үсэг зурах ёслолын ажиллагааны үеэр тус сургуулийн захирал С.И.Огай болон Гадаад харилцааны проректор Ю.Г.Журавель нар Монголын талын төлөөлөгчдийг хүлээн авч уулзав. Уулзалтын үеэр ОХУ-ын далайн тээврийн салбарын зорилтууд болон гадаад улсын мэргэжилтнүүдийг тус сургуульд бэлтгэх чиглэлээр сүүлийн жилүүдэд хүрсэн амжилтын талаар товч танилцууллаа.

Монгол Улсын Далайн захиргаа болон ОХУ-ын Адмирал Г.И.Невельскойн нэрэмжит Тэнгисийн их сургуультай хамтран ажиллах тухай харилцан ойлголцлын Санамж бичгийг байгуулж байгаадаа баяртай байгаагаа Монгол Улсын Далайн захиргааны дарга С.Түвшинтөр илэрхийлээд Санамж бичигт дурдагдсан чиглэлүүдээр буюу далайн тээврийн салбарын боловсон хүчин бэлтгэх, далбааны улсын хянан шалгагчийг мэргэшүүлэх, далайн салбарт хамтарсан судалгаа шинжилгээний ажил хийх зэргээр хамтын ажиллагааг идэвхтэй өрнүүлнэ гэдэгт итгэлтэй байгаагаа онцолсон. Түүнчлэн тус сургууль дээр зохион байгуулагддаг эрдэм шинжилгээний хурал, арга хэмжээ, сургалт, семинарын талаарх мэдээллийг Монгол Улсын Далайн захиргаанд цахим шуудангаар ирүүлж, манай багш, мэргэжилтэн, судлаачдыг хамруулахад дэмжлэг үзүүлэн хамтарч ажиллах, хоёр талын гадаад харилцааны ажилтнуудын хоорондын ажлын уялдаа холбоог сайжруулах тухай манай саналыг бүрэн дэмжиж ажиллах тухайгаа илэрхийлсэн юм. Ийнхүү Санамж бичигт талууд гарын үсэг зурснаар ёслолын үйл ажиллагаа өндөрлөлөө.